عاد عيدك

مناسبة القصيدة/ قالها الشاعر في إحتفال أهالي الذيبية باليوم الوطني الـ81

مـن هجـوس ٍ لادعـا الواجـب لها دايـم تطيـع         مالهــا بالماقـف الغصـاب صـدَّه أو عــــذر

ومن هجوس ٍ بالوفا تشري من الشعر وتبيع         مرحبا بإسـم أهـل الذيبيـة بمنهـــو حضــر

مرحـبا يا مرحـبا يا مرحــبا بإســم الجمــيـع         ديـرتــي لــو أبعــبِّـر مايســـد إميـة سطـــر

ياهـــل الذيــبيـة أنـــتم قـدركم عــندي رفـيـع         والــوفا طبــع ٍ لكم لبلادكــم ســـر وجــهـر

من عصر عبدالعزيز الحاكم الشهـم الشجـيع         معلنـين ٍ بالــولاء طال الزمـــن وإلا قصـــر

كلبــونا من شبــاب وشـايب وطـفـل ٍ رضيـع         فــدوة أرضـك يالسعـودية شبـر يتبع شـبـر

والــوداعــة مالها صـايـن لها غـير الوديـــع         ياوطــنا فـي ضمـايـرنا مـلـكـت أعـلى قــدر

ويـش كِنـَّا ويـش صــرنا نحمـد الله السميــع         اللــه إنه يحـفــظ أمـن بلادنا طــول العمــر

قبـل توحيــد البـلاد الكـــل فــي غـيِّــة يضيـع         ذا هجــد هـــذا وهذا صبح آخــر في غــدر

ذا جــريح وذا كسير وذا يــوِّن وذا صـريـــع         كــل ٍ يحـاول يعيـش ويسـلـب أمـلاك البشر

لين أبوتركــي برمح وبنـــدق وسيــفٍ لميـع         من على ظهــور الخيـــول النجب لربه ذكر

لا إله إلا اللـه أرســاها وأحســن بالـصنيـــع         ومــن جعل ربي وكيله في أمــوره ما خسر

طاع له من طاع له واللي رفض ماله شفـيع         مـاله إلا النـار والبارود والمـــوت الحمـــر

ثم عـشنا في سلام وصارت الصحـراء ربيـع         والتـطـور كل يــوم يــزود فـي بــر و بحـر

واستمـروا بعــده عياله كما الحصــن المنيـع         بالسياسة نفـس أبـوهم والفكر نفس الفكـر

مستمــدة مـن كتــاب الواحــد الفـرد البـديــع         قـادهــم لرعايــة البيتين هــذا أكـبــر فخــر

والــزمـان بحكـمهم مـن زود خيـراته سـريع         ليـن جينـا عهـد أبو متعـب وخيـر الله كثـر

والـوطـن غـالي عـلينا والفـرح عــم الجميـع        عـاد عـيدك كل يـوم من السنه طول الدهــر