محاورة كتابية بين الشاعرين محمد الجميلي و أبوزيد الغبيوي

محمد الجميلي/

ســلام اللـه سـلامٍ ياصـل أبـوزيد فالـجـوال            يخـص الصاحب اللي فارضٍ قـدره وتقديـره

نبا ناخذ ونعـطي بالجهاز وجاري الإرسـال            وإذا منه تعـذر قـلـت يـالله جـعــلهـا خــيــره

أبوزيد الغبيوي/

هـلا يامـرحبـا ترحـيـبـةٍ يضـربَّهـا الأمـثـال            تـنـجَّــب للجـمـيلي طيب الأخـلاق والسـيـره

علومي ياالجمـيلي كـان تبغـاها تسـر البـال            وتـسـمعـهـا ليا مـن المحـارب دق لك زيـره

محمد الجميلي/

يـدوم إبـك البقا لكن ياللـه تـصـلح الأحـوال            عـسـى الأوضاع تصلح والكلام يزين تعبيره

ليا مـن دق زير الحرب ماهـو جافـل الخيَّال            يبا يجفـل ضعـيفٍ محزمه ما وسطه ذخيـره

أبوزيد الغبيوي/

ليـا ميَّـزت فالـمخرج ليـا ميَّـزت فالمـدخـال            عـلـومـي واضحـه ماعـنـدنـا لـفه وتدويــره

عسى الخيَّال لاحِميَ الوطيس مع العدا يحتال          وحنا أهـل الزنود اللي لهـبها يـشعـل النيره

محمد الجميلي/

مادام سهيل يلمع بالسما والدرب دونه طال            ورى ماتهـتدي به يخدمك ضـوه وتسـفـيره

ترى شمس الحقيقه مايغـطيها صدى الغـربال         ألا يامــا ويامــا والـكـلام يجــوز تـشـفـيــره

أبوزيد الغبيوي/

أعـرف سهيل يطلع فالسما ثم يختفي بليـال            ولكـن الجـدي ثابت مايثـبـت فـالسمـا غـيره

ليا جتك الحقيقه من خصيمٍ يشـرب الفنجال            ألا يـازينـهــا زيـنــاه تـهليـلــه وتــكــبـيـــره

محمد الجميلي/

لكن سهـيل لامـنه طلع ضـف السـما بخيـال            يجـيـك الـسـيـل يابـو زيد وتربِّـع بـه الديـره

أقول الصدق ولسان الحقيقه ما عليه جدال           كلام الصدق واضح يالعـتيبي صعـب تزويره

أبوزيد الغبيوي/

ترى وبل المطـر ينـشـيه ربٍ للـكـرب حلاَّل           لاتسمع في هل التنجيم وأهل الدجل والطيره

لو إنك ناطـقٍ بالـصـدق بالإقـفـاي والإقـبال            ما تاقع يا وسيع المعرفه في ورطة وحيـره

محمد الجميلي/

يا كم من مـرةٍ خيَّل على راسك وسيله سال            تذكَّـر سـيـله التالي ويـامـكـثــر مخـاسـيــره

تبا تهرج وأبا أهـرج ثـم تكثر بيننا الأقـوال            وإذا منه توقـف موتـرك نـعـطـيـه تـغـيـيــره

أبوزيد الغبيوي/

لا واللـه بانت الخِـله ونتَّـــع وارد الـجـفــال            ورى البنزين الأحمر مايوصَّل مع مواصيره

أنا خايف بـعــد بكره يجي مـن يمك الدجَّـال            ويضحك راعي المسجد ويبكي راعي البيره

محمد الجميلي/

أبا وصلِّك البنزيـن الأحمـر تبـشـر وبالحال             ماينـتـع وارد الجــفـال لامنه دِهــن سـَيــره

ترى الدجَّال لـو شفته بعينك كان جاك هبال            ياويلك يالغـليِّـم لـو غـنت لـك مــزامــيـــــره

أبوزيد الغبيوي/

أنـا ماني بجـرفٍ كل ما هـبَّ الهوى ينهـال             أميز كلمتي وأحفـظ حقـوق الجـار والجيـره

تلكَّـع واللكاعـه يالجميـلي فـيـك حبـة خـال             وأنا مـرَّرت فـي مرماك كم شـوته وتمريـره